रुकुम — भारतमा रोजगारी गर्दै आएका श्रीमानको आम्दानीबाट घरपरिवार चलाउँदै आएकी २५ वर्षीया एक महिला अनलाइन ठगीको सिकार बनेपछि गम्भीर मानसिक तनावमा परेकी घटनाले डिजिटल सुरक्षाबारे फेरि प्रश्न उठाएको छ।
ती महिला श्रीमान, सासू–ससुरा, देवर र तीन वर्षका छोरासँग बस्दै आएकी थिइन्। सामाजिक सञ्जाल प्रयोगका क्रममा व्हाट्सएपमा अपरिचित व्यक्तिले ठूलो रकमको चिठ्ठा परेको भन्दै सम्पर्क गरेको र रकम पाउन अग्रिम पैसा तिर्नुपर्ने बताएको परिवार स्रोतले जनाएको छ।
प्रलोभनमा परेर उनले विभिन्न व्यक्तिसँग ऋण माग्नुका साथै सुनका गहना बेचेर समेत रकम जुटाइ पठाएको बताइन्छ। त्यसपछि ठग समूह सम्पर्कविहीन बनेपछि मात्र आफू ठगिएको थाहा भएको थियो।
घटनापछि उनी गम्भीर निराशामा परेकी र पछि दुखद अवस्था सिर्जना भएको परिवारले जनाएको छ। यो घटनालाई विज्ञहरूले डिजिटल ठगीले निम्त्याउन सक्ने मानसिक दबाबको उदाहरणका रूपमा लिनुपर्ने बताएका छन्।
प्रहरी तथा साइबर विज्ञहरूले अपरिचित व्यक्तिको सन्देश, चिठ्ठा, उपहार वा लटरीको नाममा रकम माग्ने प्रस्तावप्रति सचेत रहन, यस्ता गतिविधि देखिएमा तुरुन्त उजुरी गर्न आग्रह गरेका छन्।
