काठमाडौँ —गत फागुन २१ गते सम्पन्न संघीय निर्वाचनमा पार्टीले गम्भीर धक्का व्यहोरेपछि नेकपा एमालेभित्र आन्तरिक नेतृत्व परिवर्तन र पार्टी पुनर्गठनको बहसले तीव्र रूप लिएको छ। जारी आठौँ सचिवालय बैठकमा अध्यक्ष केपी शर्मा ओली स्पष्ट अल्पमतमा परेका छन् भने बहुमत पदाधिकारीहरूले उनलाई मार्गप्रशस्त गर्न (राजीनामा दिन) दबाब दिएका छन्।
आइतबार बिहान ११ः३० बजे अध्यक्ष ओलीको निवास (गुण्डु) मा सचिवालयको चौथो बैठक बस्दैछ, जहाँ बाँकी रहेका चार जना सचिवहरू शेरधन राई, भानुभक्त ढकाल, राजन भट्टराई र खगराज अधिकारीले आफ्नो धारणा राख्ने उपमहासचिव लेखराज भट्टले जानकारी दिएका छन्।
सचिवालयका १९ मध्ये १२ नेता ओलीको विपक्षमा
६ महिनाअघि सम्पन्न ११ औँ महाधिवेशनबाट निकै शक्तिशाली बनेका अध्यक्ष ओली निर्वाचनको परिणामपछि भने आफ्नै विश्वासपात्रहरूबाट घेरिएका छन्। १९ सदस्यीय सचिवालयमा अहिलेसम्म धारणा राखेका १४ नेतामध्ये १२ जनाले पार्टीलाई यथास्थितिमा राख्न नसकिने भन्दै नेतृत्व हस्तान्तरणको माग गरेका छन्।
महासचिव शंकर पोखरेल र उपाध्यक्षहरूको मोर्चा: कुनै समय ओलीका निर्विकल्प सारथी मानिएका महासचिव शंकर पोखरेल, उपाध्यक्षहरू विष्णु पौडेल, पृथ्वीसुब्बा गुरुङ, गोकर्ण विष्ट र रघुजी पन्तले खुलेरै ओलीको विकल्प खोज्नुपर्ने धारणा राखेका छन्। महासचिव पोखरेलले कार्यकर्तामा ऊर्जा थप्न अध्यक्षले निकास दिनुपर्ने बताएका छन्।
गोकर्ण विष्टको प्रस्ताव: उपाध्यक्ष गोकर्ण विष्टले "पार्टी जोगाउन सबैले पद त्याग्न तयार हुनुपर्छ" भन्दै कडा प्रस्ताव अघि सारेका छन्।
६० वर्षे उमेर हदको चुनौती: उपमहासचिव लेखराज भट्टले पार्टी पुनर्गठन गर्ने भए ६० वर्षमाथिका सबै नेताहरूले एकैपटक बिदा लिनुपर्ने चुनौती दिएका छन्।
बादल र बस्नेत मात्र ओलीको बचाउमा
सचिवालयमा अहिलेसम्म खुलेर अध्यक्ष ओलीको बचाउ गर्नेमा उपाध्यक्ष रामबहादुर थापा 'बादल' र सचिव महेश बस्नेत मात्र छन्। उपमहासचिव पृथ्वीसुब्बा गुरुङ र पद्मा अर्यालले नेतृत्वको आलोचना गरे पनि मध्यमार्गी धार समातेका छन्।
निरन्तर राजीनामा र मार्गप्रशस्तको दबाब बढेपछि अध्यक्ष ओलीले भने आफू तत्काल पद छाड्ने मनस्थितिमा नरहेको बैठकमै स्पष्ट पारेका छन्। सचिवालयमा अल्पमतमा परे पनि केन्द्रीय कमिटीमा आफ्नो बहुमत रहेको ओलीको दाबी छ।
अनेरास्ववियुको बैठकमा समेत खैलाबैला
ओलीको राजीनामाको बहस सचिवालयमा मात्र सीमित नरहेर एमाले निकट विद्यार्थी संगठन अनेरास्ववियुसम्म पुगेको छ। शनिबारबाट सुरु भएको अनेरास्ववियुको केन्द्रीय कमिटी बैठकमा उपमहासचिव कमलराज जोशीले संगठन र पार्टीलाई जीवन्त राख्न ‘मुहान सफा गर्नुपर्ने’ भन्दै नेतृत्व परिवर्तनको एजेन्डा उठाएका थिए। सो विषयलाई लिएर विद्यार्थी नेताहरूबीच बैठकमै भनाभन र खैलाबैला समेत भएको स्रोतले जनाएको छ।
आज सकिने एमाले सचिवालय बैठकले निर्वाचनको समीक्षा, संविधान संशोधन कार्यदल गठन र आगामी केन्द्रीय कमिटीको बैठक आह्वान गर्ने नेताहरूले बताएका छन्।
