काठमाडौं—भारतको कर्नाटक राज्यअन्तर्गत पर्ने बेलगावीमा घरभित्र राखिएको चिस्यान यन्त्र (फ्रिज) एक्कासि विष्फोट हुँदा एकै परिवारका चार जनाको जलेर ज्यान गएको छ भने अन्य दुई जना गम्भीर घाइते भएका छन्।
प्रहरीका अनुसार यो हृदयविदारक घटना सोमबार राति अबेर मार्केट प्रहरी वृत्त क्षेत्रअन्तर्गत पर्ने चावट गल्लीमा भएको हो। विष्फोटका कारण घरमा भीषण आगलागी भएको र भित्र रहेका सदस्यहरू बाहिर निस्कन नपाई आगोको चपेटामा परेका थिए।
ज्यान गुमाउनेहरूमा ६५ वर्षीय गजानन धामोने, ५० वर्षीया भारती धामोने, ४५ वर्षीया शारदा धामोने र २१ वर्षीय रोशन धामोने रहेका छन्।
उक्त घटनामा २८ वर्षीया प्रिया धामोने र २५ वर्षीया गङ्गा धामोने गम्भीर रूपमा जलेका छन्। उनीहरूलाई तत्काल उद्धार गरी उपचारका निमित्त अस्पताल भर्ना गरिएको छ र हाल उनीहरूको स्वास्थ्योपचार भइरहेको प्रहरीले जनाएको छ।
प्रारम्भिक अनुसन्धानबाट प्राप्त जानकारीअनुसार घरभित्र रहेको फ्रिज पड्किएपछि हेर्दाहेर्दै आगोको लप्का सिङ्गो घरभरि फैलिएको थियो। फ्रिज विष्फोट हुनुको यकिन कारण अझै पत्ता लाग्न सकेको छैन भने यस घटनाको सम्बन्धमा प्रहरीले सूक्ष्म रूपमा थप अनुसन्धान अगाडि बढाएको छ।
_1739267551.png)
