स्वास्थ्य समाचार — स्याउ स्वास्थ्यका लागि निकै लाभदायक फल मानिन्छ। यसमा प्रशस्त मात्रामा फाइबर पाइन्छ, जसले पाचन प्रणालीलाई स्वस्थ राख्न र कब्जियतको समस्या कम गर्न मद्दत गर्छ। तर, स्याउ खाने तरिका नमिल्दा केही व्यक्तिमा पेट फुल्ने, ग्यास हुने र पेट दुख्ने समस्या देखिन सक्छ।

जापानी पोषणविद् मोमोको नात्सुमेका अनुसार स्याउ खाँदा गरिने पाँच सामान्य गल्तीले पाचनमा असहजता निम्त्याउन सक्छन्।

१. खाली पेटमा स्याउ खानु

बिहान उठ्नेबित्तिकै खाली पेटमा स्याउ खाने बानी केही व्यक्तिका लागि उपयुक्त नहुन सक्छ। स्याउमा पाइने प्राकृतिक चिनी र फाइबरका कारण पेटमा ग्यास उत्पन्न हुन सक्छ। त्यसैले खाली पेटमा मात्रै स्याउ खानुभन्दा अन्य खानेकुरासँगै खानु राम्रो हुन्छ।

२. एकैपटक धेरै स्याउ खानु

स्याउ स्वास्थ्यका लागि फाइदाजनक भए पनि धेरै खानु राम्रो होइन। एकैपटक दुई–तीनवटा स्याउ खाँदा शरीरमा फाइबर र प्राकृतिक चिनीको मात्रा बढी हुन सक्छ। यसले पेट फुल्ने र ग्यास बढ्ने समस्या निम्त्याउन सक्छ। त्यसैले आफ्नो पाचन क्षमताअनुसार उचित मात्रामा खानुपर्छ।

३. फ्रिजबाट निकाल्नेबित्तिकै स्याउ खानु

फ्रिजमा राखिएको अत्यधिक चिसो स्याउ खाँदा संवेदनशील पाचन प्रणाली भएका केही व्यक्तिलाई पेट दुख्ने वा असहज हुने समस्या हुन सक्छ। यस्तो समस्या हुने व्यक्तिले फ्रिजबाट निकालेपछि केही समय सामान्य तापक्रममा राखेर खानु राम्रो हुन्छ।

४. संवेदनशील पेट भए पनि बोक्रासहित खानु

स्याउको बोक्रामा प्रशस्त फाइबर हुन्छ। तर, पाचन प्रणाली कमजोर भएका केही व्यक्तिलाई बोक्रासहितको स्याउ पचाउन कठिन हुन सक्छ। यस्तो अवस्थामा बोक्रा हटाएर वा हल्का बफाएर खान सकिन्छ। यद्यपि, सामान्य अवस्थामा बोक्रासहित स्याउ खानु फाइदाजनक हुन्छ।

५. राम्रोसँग नचपाई छिटो खानु

स्याउलाई राम्रोसँग नचपाई छिटोछिटो खाँदा पाचनमा असहजता हुन सक्छ। ठूलो टुक्रामा स्याउ निल्दा पचाउन केही कठिन हुन सक्छ। त्यसैले स्याउलाई सानो टुक्रा बनाएर बिस्तारै र राम्ररी चपाएर खानुपर्छ।

स्याउ खाँदा ध्यान दिनुपर्ने कुरा

स्याउमा पाइने फाइबरले आन्द्राको स्वास्थ्य राम्रो राख्न र कब्जियत कम गर्न सहयोग गर्छ। त्यसैले स्याउ खान छोड्नुपर्ने होइन, सही तरिकाले र उचित मात्रामा खानुपर्ने हो। विशेषगरी पेट फुल्ने वा ग्यासको समस्या हुने व्यक्तिले स्याउ खाएपछि आफ्नो शरीरमा देखिने प्रतिक्रियालाई ध्यान दिनुपर्छ।

स्याउ सबैका लागि लाभदायक भए पनि खाने तरिका र पाचन क्षमताअनुसार यसको प्रभाव फरक पर्न सक्छ।

Yoga Journal मा प्रकाशित जापानी पोषणविद् मोमोको नात्सुमेको सुझावमा आधारित