विराटचोक - लोकप्रिय गायक हेमन्त शर्मा यही फागुन १९ गते मोरङको सुन्दरहरैँचा आउने भएका छन् । सुन्दरहरैँचा १० स्थित 'द राइजिङ इङ्ग्लिस बोर्डिङ स्कुल'को ३२औँ वार्षिकोत्सव तथा अभिभावक दिवसको अवसरमा उनी आउने भएका हुन् ।
विद्यालयको उक्त कार्यक्रमको मुख्य आकर्षणका रूपमा ख्याति प्राप्त गायक, सङ्गीतकार एवम् गीतकार हेमन्त शर्माको विशेष साङ्गीतिक प्रस्तुति रहने विद्यालयका प्रिन्सिपल गोपाल पाठकले जानाकारी दिए ।
जीवनोपयोगी शिक्षासँगै संस्कार, ज्ञान, चेतना र कला सिकाउने विद्यालय 'द राइजिङ इङ्ग्लिस बोर्डिङ स्कुल' को उक्त कार्यक्रममा पुरस्कार वितरणसहित गायक शर्माको साथमा स्थानीय कलाकार र विद्यार्थीहरूको साङ्गीतिक प्रस्तुति रहने विद्यालय सञ्चालक समितिका अध्यक्ष सुरेन्द्रबहादुर थापाले बताए ।
विद्यालयको प्राङ्गणमा बिहान १० बजेदेखि सुरु हुने कार्यक्रममा सम्पूर्ण नगरबासी महानुभावहरूमा उपस्थितिका लागि विद्यालयले निमन्त्रणासमेत गरेको छ । सयभन्दा बढी गीत गाइसकेका गायक शर्माका ‘माया सारै महँगो’, थाप न थाप’, आउँदै गर मालती’, मूल हौ भने रसाइदेऊ’ बोलका गीतहरू निकै चर्चित छन् ।
