काठमाडौं—भारतले दार्चुलास्थित महाकाली नदीमा नेपाली भूमिमा तटबन्ध निर्माण गरिरहेको छ। तर, नेपाल सरकारले यसबारे भारतीय पक्षलाई औपचारिक रूपमा रोक्न भनेको छैन। दार्चुलाको खलङ्गास्थित वीरेन्द्र वनको पारिपट्टि नेपाली भूभागमा भारतले एकतर्फी रूपमा तटबन्ध निर्माण गरिरहेको छ।
महाकाली नदीको गल्फैपारि र खुलामञ्चपारिको जमिन नेपालको भए पनि ११ वर्षअघिको बाढीले नदीको बहाव भारततर्फ मोडिएपछि समस्या सिर्जना भएको हो। अहिले सोही भूभागमा भारतले तटबन्ध निर्माण गरिरहेको छ।
एमाले दार्चुलाले यस विषयमा कडा आपत्ति जनाउँदै प्रमुख जिल्ला अधिकारी (प्रजिअ) अनिल पौडेललाई ज्ञापनपत्र बुझाएको छ। ज्ञापनपत्रमा कूटनीतिक पहलमार्फत तटबन्ध निर्माण तत्काल रोक्न माग गरिएको छ। एमाले दार्चुला अध्यक्ष ज्ञानेन्द्र घर्तीले तटबन्धले नदीको धार परिवर्तन हुने जोखिम औंल्याउँदै यसले नेपालको भौगोलिक अखण्डता प्रभावित गर्ने बताएका छन्।
प्रजिअ पौडेलले सम्वद्ध पक्षलाई पत्राचार गरी जानकारी गराइसकेको बताए। साथै, उनले भारतीय समकक्षीसँग नियमित सम्पर्कमा रहेको दाबी गरे। यद्यपि, भारतले तटबन्ध निर्माण जारी राखेकाले यो मुद्दा अझै समाधान भएको छैन।
भारतले अन्तरराष्ट्रिय सीमारेखा मिचेर तटबन्ध बनाइरहेको विषयलाई लिएर नेपाल सरकारले तत्काल कूटनीतिक पहल गर्नुपर्ने माग बढ्दो छ। स्थानीयवासी र राजनीतिक दलहरूले पनि यस विषयमा ठोस कदम चाल्न सरकारलाई दबाब दिइरहेका छन्।
