कराँची—पाकिस्तानको कराँचीस्थित मलीर जिल्ला जेलमा सोमबार राति भूकम्पपछि उत्पन्न भागदौडका कारण २१६ कैदी फरार भएका छन्। घटनामा एक कैदीको मृत्यु भएको छ भने केही सुरक्षाकर्मी घाइते भएका छन्।
पछिल्लो ४८ घण्टामा कराँचीमा ९ देखि ११ पटक २.६ देखि ३.६ रिक्टर स्केलका भूकम्पका झट्काहरू महसुस गरिएको थियो। यी झट्काले जेलको बाहिरी पर्खाल कमजोर बनाएपछि सोमबार राति कैदीहरूलाई बैरकबाट बाहिर निकालिएको थियो।
जेल प्रशासनका अनुसार, गार्डहरूको सुरक्षा सतर्कता कम भएको मौकामा केही कैदीहरूले आक्रमण गरे र उनीहरूले गार्डहरूबाट हतियार खोस्दै कमजोर पर्खाल भत्काए र फरार भए।
सिन्ध प्रान्तका प्रहरी महानिरीक्षक गुलाम नबी मेमनले बताएअनुसार, फरार भएका २१६ कैदीमध्ये ७८ पुनः पक्राउ परेका छन् भने १३८ अझै फरार छन्।
सामाजिक सञ्जालमा कैदीहरूको भागदौडका दृश्य देखिएका भिडियोहरू भाइरल भएका छन्। ती भिडियोमा केही कैदीहरूले वर्षौँदेखि जेलमा रहेको र अहिले स्वतन्त्र भएको बताएको सुनिएको छ।
सिन्धका गृहमन्त्री जिया-उल-हसन लाञ्जरले यो घटनालाई पाकिस्तानको ठूला जेलब्रेकमध्ये एक भनेका छन्। घटनाको अनुसन्धान सुरु भइसकेको र फरार कैदीहरूको खोजी तीव्र गतिमा भइरहेको उनले जनाए।
भूकम्पीय संवेदनशील क्षेत्रका जेलहरूमा संरचनात्मक सुरक्षा र आपतकालीन व्यवस्थापन सुधार गर्न यस घटनाले गम्भीर ध्यानाकर्षण गराएको छ।
