काठमाण्डौं—चितवनको मुग्लिङ नारायणगढ सडक अन्तर्गत तुइन खोला पुल नजिक खसेको पहिरोलाई पन्छाउन नसक्दा करिव ३० घण्टादेखि यातायात आवागमन बन्द भएको छ । जसका कारण हजारौँ यात्रु तथा यातायात मजदुरहरु समस्यामा परेकाछन् ।
असोज ३ गते साँझ साढे ६ बजेदसखि खसेको पहिरो निरन्तर खसिरहेका कारण अहिलेसम्म सडक सफा गर्न नसक्दा यात्रुहरु सडकमै अलपत्र परेकाछन् । लामो समय सडक जाम हुँदा खाद्यान्नको समस्या परेको छ । यसैक्रममा मुग्लिङका स्थानीयले पहल गरेर खान समस्यामा परेका यात्रु तथा मजदुरहरुलाई खाद्यान्न सहयोग जुटाईरहेकाछन् ।
त्यस्तै राइडर्स युनियन नेपाल चितवन जिल्ला कमिटीले बिस्कुट र पानी वितरण गरेका छन् । युनियन चितवनका उपाध्यक्ष आलोककुमार श्रेष्ठको अगुवाईमा १५ जना समुहको राइडर्स टोलीले २० कार्टुन पानी र २ सय पिस बिस्कुट वितरण गरेको युनियनका केन्द्रीय अध्यक्ष माधव पाण्डेले बताउनुभयो ।
पहिरो खसिरहेको र रातको समय भएकाले पहिरो पन्छाउने कार्य आजलाई स्थगन भएको छ । पहिरो पन्छाउने कार्य रोकिएसंगै यातायात आवागमन कहिलेबाट हुने भन्ने समेत अन्यौल रहेको सडक डिभिजन भरतपुरले जनाएको छ ।
