जेन-जेडका मुद्दा उठाउने, युवाको रोजगारी, गुणस्तरीय शिक्षा, प्रविधिमा पहुँच, पारदर्शिता, सुशासन र न्यायको पक्षमा स्पष्ट रूपमा उभिने व्यक्तिलाई नै चुनावमा टिकट दिनुपर्छ। केवल पैसा, पहुँच वा व्यक्तिगत फाइदाका आधारमा टिकट बाँड्ने पुरानो संस्कार अब जेन-जेडले स्वीकार गर्ने छैन। आजको पुस्ता केवल नारामा होइन, परिणाममा विश्वास गर्छ, र त्यो परिणाम दिन सक्ने नेतृत्वलाई मात्र हामी समर्थन गर्छौं।
स्टेकहोल्डर, संघर्षशील युवा नेतृत्व र जेन-जेडको भरोसा जितेको व्यक्तिलाई पाखा लगाएर कुनै पनि पार्टीले व्यावसायी वर्ग, दलाल प्रवृत्ति वा सत्ता–पुँजीको संरक्षणमा टिकट वितरण गर्यो भने त्यसको सीधा विरोध हुनेछ। यो असन्तुष्टि लुकाएर बस्ने विषय होइन—यो चुनावी बहिष्कार, खुला अभियान र सार्वजनिक प्रतिवादमा बदलिनेछ। अब जेन-जेडप्रयोग हुने भीड होइन, निर्णय बदल्ने शक्ति हो भन्ने कुरा सबैले बुझ्नुपर्छ।
अब समय फेरिएको छ। जेन-जेडले पोस्टर टाँस्न, भाषण सुन्न र चुनावपछि बेवास्ता हुनका लागि राजनीति गरेको छैन। हामी नीति बनाउने, उम्मेदवार छान्ने र नेतृत्व निर्धारण गर्ने प्रक्रियामा प्रत्यक्ष सहभागिता चाहन्छौं। हाम्रो आवाजलाई कमजोर ठानियो भने त्यो राजनीतिक रूपमा महँगो सावित हुनेछ। टिकट वितरणमै जेन-जेडको अपमान गरियो भने, त्यसको जवाफ मतबाट, सडकबाट र सामाजिक सञ्जालबाट एकैसाथ दिइनेछ।
यो चेतावनी कुनै व्यक्ति, जात वा समुदाय विरुद्ध होइन; यो गलत राजनीतिक संस्कार, अपारदर्शी टिकट प्रणाली र युवामाथि गरिने उपेक्षा विरुद्ध हो। जेन-जेड ले अब सम्झौता होइन, प्रतिनिधित्व खोज्छ। परिवर्तनको नाममा उही अनुहार, उही सोच र उही स्वार्थ अघि सारियो भने त्यसको परिणाम पार्टीहरूले चुनावमै भोग्नुपर्नेछ।
जेन-जेड अब मौन छैन, डराएको छैन र सम्झौतामा छैन। टिकट पनि हाम्रो मुद्दामा, हाम्रो समर्थनमा र हाम्रो भविष्य बुझ्ने व्यक्तिलाई दिनुपर्छ। अन्यथा, चुनावी मैदानमै स्पष्ट, खुला र संगठित विरोध हुनेछ—यसको सम्पूर्ण जिम्मेवारी टिकट दिने नेतृत्वले नै लिनुपर्नेछ।
लेखक: रितेश शाह(जेन-जेड)
