विराटचोक - मोरङको बेलबारी स्थित  बेतना सिमासार सामुदायिक वन उपभोत्ता समुह भित्र संरक्षित रुपमा राखिएको भाले चित्तल चोरी भएको ६ दिन बितिसक्दा समेत चोरीमा संलग्नहरुको पहिचान खुल्न सकेको छैन । 

सब डिभिजन वन कार्यलय बेलबारीका रेञ्जर  राजेन्द्र कुमार घिमिरेको नेतृत्वमा रहेको छानबिन समितिले सोही समयमा सुरक्षा गार्ड रहेका  बेतना सेक्युरिटी सर्भिसका सेक्युरिटी गार्डहरु बेलबारी ४ का महेन्द्र कार्की र कृष्ण न्यौपानेलाई बयान लिएको । बयानमा उनीहरुले आफुहरुबाट डयुटीमा कमजोरी भएको स्वीकार गरेपनि चोरीका बिषयमा आफुहरुलाई केही थाह नभएको बताएका छन ।

समितिले बेतना सिमसार सामुदायिक वन उपभोत्ता समुहका केही पदाधिकारीहरुलाई समेत बयान लिने तयारी गरेको छ ।  पछिल्लो पटक शुक्रबार बिहान ३ बजेर १५ मिनेट देखि ३ बजेर २५ मिनेटको समयमा संरक्षित रुपमा राखिएको भाले चित्तललाई मारेर अज्ञात ब्यत्तिहरुले बाहिर लगेको बेतना सिमसारको सिसिटिभी फुटेजमा  देखिन्छ । 

यसअघि बेतनाबाट राज हाँस,चित्रल,कछुवा,माछा,निलगाई,२ वटा अजिंगर लगायत गायब भईसकेका छन । छानबिन समितिले ईलाका प्रहरी कार्यलय बेलबारीलाई समेत घटनाको छानबिनमा सहयोग गरिदिन अनुरोध सहित पत्रचार गरेको छ ।