पूर्वपश्चिम एसियन राजमार्ग बिस्तारका लागि मोरङको कानेपोखरीबाट किनारका रुख काट्न थालिएको छ ।
दुई लेन’सडकलाई चार लेनमा बिस्तार गर्ने योजना अनुरुप मंगलबारदेखि रुख कटान सुरु भएको हो ।
सो क्षेत्रमा राजमार्ग विस्तारका क्रममा १२ हजारभन्दा बढी रूख कटान हुनेछन् । एसियाली विकास बैंकको २८ अर्ब १७ करोड रुपैयाँ सहयोग र सोही लागतमा झापा, मोरङ र सुनसरीसँग जोडिएको पूर्व पश्चिम राजमार्गको १ सय २० किलोमिटर क्षेत्र चार लेनको बनाइनेछ ।
एसियाली विकास बैंकको सहयोगमा पूर्वी नेपालको काँकडभिट्टादेखि सुनसरीको लौकहीसम्म १ सय २० किलोमिटर सडक बिस्तार गरी चार लेनको बनाउने काम अघि बढेको सडक आयोजना प्रमुख जगत प्रजापतीले बताए ।
कोशी प्रदेशका पर्यटन, वन तथा वातावरण मन्त्री गणेशप्रसाद उप्रेतीले राजमार्ग बिस्तारका लागि रुख कटानको सुरुवात गरेका छन् ।
राजमार्गलाई ग्रामीण तथा वन क्षेत्रमा २४ मिटर, अर्धसहरी क्षेत्रमा ३३ मिटर र सहरी क्षेत्रमा सर्भिस लेनसहित ५० मिटर चौडाइको बनाउने योजना छ ।
सो क्षेत्रमा ७१ वटा नयाँ पुलसहित राजमार्ग विस्तार हुनेछ । एसियाका ३२ मुलुकलाई जोड्ने ‘एसियाली राजमार्ग अन्तर्गत मेचीपुल निर्माणसँगै झापामा एक किलोमिटर सडक निर्माण भइसकेको छ ।
