विराटचोक । आप्रवासी महिलाहरुको हकहितका लागि काम गर्दै आएको संस्था आप्रवासी महिला कामदार समुह (आमकास) नेपाल मोरङ जिल्ला शाखाले अस्ट्रेलियन राजदुतावासको सहयोगमा १ सय ३५ औं अन्तर्राष्ट्रिय मजदुर दिवसको अवसरमा सुन्दरहरैँचामा विभिन्न कार्यक्रम गरेको छ ।
मर्यादित काम, श्रमिकको सम्म्मान हाम्रो अभियान भन्ने नारासहित आमकास नेपालले श्रमिक सम्मान तथा सचेतना कार्यक्रम गर्दै अन्तर्राष्ट्रिय मजदुर दिवस मनाएको हो ।
संस्थाकी मोरङ जिल्ला अध्यक्ष उमादेवी सेढाईको अध्यक्षतामा सुन्दरहरैंचा १० खोर्सानेस्थित सिद्दार्थ सेकेण्डरी स्कुलमा बुधवार भएको कार्यक्रममा दुईजना श्रमिक मजदुरहरुलाई नगदसहित सम्मान गरिएको छ । सो अवसरमा सुन्दरहरैँचा-८ की गीता शिवा र सुन्दरहरैँचा-१० का सुर्यबहादुर थापालाई सम्मानित गरिएको हो ।
कार्यक्रममा संस्थामा आबद्ध महिलाहरुका अलावा सुन्दरहरैँचा- १० का वडा सदस्य रमेश गौतम, सिद्दार्थ सेकेण्डरी स्कुलका प्रिन्सिपल अर्जुन बस्नेत, सुकुना क्याम्पसका पुर्व स्ववियु सभापति बद्री अर्याल, समाजसेवी रन्जु सुवेदी लगायतले श्रमिकहरुको हक हितका बिषयमा मन्तव्य व्यक्त गरेका थिए ।
आमकास नेपाल मोरङकी सचिव ईन्दिरा प्रसाईले संचालन गरेको कार्यक्रममा उपाध्यक्ष राधिका खतिवडाले स्वागत मन्तव्य व्यक्त गरेकी थिइन् । अतिथिहरुलाई सह सचिव मिना बजगाई, भागिरथा चुडाल र राधिका खतिवडा, रिता चौधरी, हिमा निरौला लगायतले स्वागत तथा सम्मान गरेका थिए ।
अन्तर्राष्ट्रिय मजदुर दिवसको अवसरमा संस्थाले श्रमिकहरुले जानैपर्ने कुरा तथा श्रमिक हक र अधिकारबारे प्रशिक्षण कार्यक्रम पनि सम्पन्न गरेको छ । तालिममा मिलन घिमिरेले सहजीकरण गरेका थिए ।
संस्थाकी जिल्ला अध्यक्ष उमादेवी सेढाईले घरेलुु कामदारलाइ सम्मानित व्यवहार अहिलेको प्रमुख चुनौती रहेकोे बताइन् । महिला श्रमिकहरुको हकहितका लागि विभिन्न काम गरेको संस्थाले ८ जनालाई ५० हजारका दरले रकम दिएर उद्यम शुरु गराएको र बिदेशमा अलपत्र परेका २ जना महिला श्रमिकको उद्दार गरेको अध्यक्ष सेढाईँले जानकारी दिइन् ।
सन् १८८६ मा अमेरिकाको सिकागोमा ‘आठ घन्टा काम, आठ घन्टा मनोरञ्जन र आठ घन्टा आराम’ नारासहित सुरु भएको मजदुर आन्दोलनको सम्झनामा विश्वभर श्रमिक दिवस मनाइन्छ ।
