काठमाडौं—प्रेस चौतारी नेपालले दशौं राष्ट्रिय महाधिवेशन आगामी फागुन २३ देखि २५ गतेसम्म विराटनगरमा गर्ने निर्णय गरेको छ। अध्यक्ष गणेश बस्नेतको अध्यक्षतामा बुधवार काठमाडौंमा बसेको केन्द्रीय सचिवालय बैठकले महाधिवेशन विराटनगरमा गर्ने निर्णय गरेको हो।
बैठकले जिल्ला र प्रदेश अधिवेशनका मिति पनि तोकेको छ, जसअनुसार माघ २५ गतेभित्र जिल्ला अधिवेशन र फागुन ७ गतेभित्र प्रदेश अधिवेशन सम्पन्न गरिनेछ।
महासचिव हिरामान लामाका अनुसार यो महाधिवेशन देश र राज्य व्यवस्थाविरुद्ध भइरहेका विभिन्न आक्रमणलाई चिर्ने तथा श्रमजीवी पत्रकारहरूको आर्थिक र सामाजिक सुरक्षाका एजेण्डालाई अगाडि बढाउने महत्वपूर्ण अवसर हुनेछ। साथै, राष्ट्र, राष्ट्रियता, र लोकतन्त्रलाई थप सुदृढ बनाउन महाधिवेशनले भूमिका खेल्ने बताइएको छ।
महाधिवेशन सम्पन्न गर्न अध्यक्ष बस्नेतको नेतृत्वमा मुल व्यवस्थापन समिति गठन गरिएको छ। यसका अतिरिक्त नेकपा एमाले जनसंगठन समन्वय संयन्त्रका संयोजक भानुभक्त ढकाल, प्रचार तथा प्रकाशन विभाग प्रमुख एवं प्रेस चौतारी नेपालका इञ्चार्ज राजेन्द्र गौतम, र संगठन विभाग सचिव माधव ढुंगेलको विशेष सहभागिता रहेको बैठकमा महाधिवेशनको मिति तय गरिएको हो।
महाधिवेशनले पत्रकार आन्दोलनलाई सशक्त बनाउन, पत्रकारहरूको अधिकार स्थापित गर्न, र लोकतान्त्रिक प्रणालीलाई मजबुत बनाउन महत्वपूर्ण योगदान गर्ने अपेक्षा गरिएको छ।
_1739267551.png)
