काठमाडौं – नेकपा एमालेका सचिव योगेश भट्टराईले नेपालको प्रमुख राजनीतिक दलहरूमा तेस्रो पुस्ताको नेतृत्व उदय भइरहेको बताएका छन्।
एक अन्तर्वार्तामा भट्टराईले भने, “पहिलो पुस्ता राजनीतिक सक्रियताबाट लगभग बाहिरिइसकेको छ। दोस्रो पुस्ताले पनि विस्तारै बिदा लिने बेला भएको छ। उमेर र अनुभव दुवैका हिसाबले यो पुस्ताले दिनुपर्ने धेरै कुरा दिइसकेको छ। अबको नेतृत्व तेस्रो पुस्ताले लिनुपर्छ।”
भट्टराईले तेस्रो पुस्ताको नेतृत्व आवश्यकतामा जोड दिँदै भने, “एमालेमा तेस्रो पुस्ता भनेको हामी नै हौं। हामी महासचिव, उपाध्यक्ष र सचिवको भूमिकामा छौं। यो नेतृत्व प्रतिस्पर्धाबाट स्वच्छ र मर्यादित तरिकाले आउनुपर्छ। पार्टीको आन्तरिक लोकतन्त्रलाई मजबुत बनाउन यो प्रक्रिया महत्त्वपूर्ण छ।”
तेस्रो पुस्तालाई पहिलो र दोस्रो पुस्ताले जस्तै “इतिहास भजाएर” नेतृत्वमा आउन सजिलो नहुने भट्टराईले बताए। “पहिलो र दोस्रो पुस्ता भूमिगत संघर्ष र जेल जीवनजस्ता अनुभवले परिचित थियो। तर, अबको नेतृत्व क्षमताको आधारमा प्रतिस्पर्धाबाट मात्र स्थापित हुनसक्छ,” उनले थपे।
भट्टराईले तेस्रो पुस्ताको उदय केवल एमालेमा मात्र नभएर कांग्रेसजस्ता अन्य प्रमुख राजनीतिक दलमा पनि लागू हुने बताए।
सचिव भट्टराईको विचारले नेपाली राजनीतिमा नेतृत्व हस्तान्तरणको महत्त्वलाई उजागर गरेको छ।
