काठमाडौं— काभ्रेको मण्डनदेउपुर नगरपालिका-१० बाँसटौवामा भएको एउटा अनौठो घटनाले सबैको ध्यान तानेको छ । बिहीबार राति चट्याङ परेपछि ठूलो कटहरको रुखमा आगो लागेको थियो, जुन २ दिनसम्म बलिरह्यो।
बिहीबार राति करिब १२ बजे परेको चट्याङले रुखलाई दनदनी बल्न थाल्यो वडाध्यक्ष कुमार तामाङले बताए । "रुख पूरै सुकेको थिएन, तर पातहरू थिएनन्। चट्याङ परेलगत्तै रुख पड्किंदै बलिरहेको देख्यौँ। सुरुमा आफैँले निभाउन खोज्यौँ, तर सकेनौँ," तामाङले भने'।
स्थानीयवासीको प्रयास असफल भएपछि उपमेयर विष्णुमणि नेपालमार्फत सशस्त्र प्रहरीलाई खबर गरियो। सशस्त्र प्रहरीको टोलीले घटनास्थलमा पुगेर आगो निभाउन प्रयास थाले। "चट्याङ परेर आगो लाग्नु र रुख दुई दिनसम्म बल्नु मेरो करिअरकै नयाँ अनुभव हो," सशस्त्रका एसपी प्रेमप्रसाद प्रसाईंले भने।
रुखको टुप्पोबाट फैलिएको आगो निभाउन डोरीको सहायताले हाँगा काट्ने उपाय अपनाइयो। दमकलको प्रयोग गर्न स्थानको कठिनाइले सम्भव भएन। आगो निभाउन टोलीलाई करिब ३ घण्टा लाग्यो।
एसपी प्रसाईंका अनुसार, यो घटना चट्याङले दूध आउने रुखहरूमा पार्ने प्रभावको उदाहरण हो। "विज्ञहरूले यस्तो घटना दुर्लभ भए पनि सम्भव भएको बताएका छन्," उनले थपे।
मेयर टोकबहादुर वाइबाले यस दुर्लभ घटनाले प्राकृतिक प्रकोपप्रति सतर्कता अपनाउन आवश्यक रहेको बताए। "भाग्यवश, कुनै मानवीय क्षति भएन। तर, यसले जोखिमको गम्भीरता झल्काउँछ," उनले भने।
यो घटना केवल प्राकृतिक प्रकोपको मात्र होइन, प्रकृतिको अचम्म र शक्तिको एउटा उदाहरण पनि हो। २ दिनसम्म बलिरहेको कटहरको रुखले स्थानीयवासीमा भय र चासो दुवै पैदा गरेको थियो ।
हेर्नुहोस भिडियो:हेर्नुहोस भिडियो:
