धरान –धरानकी पूर्व उपमेयर मन्जु भण्डारीले जेनजी आन्दोलनका क्रममा आफ्नो घर ध्वस्त भएको घटनाप्रति गहिरो पीडा व्यक्त गर्दै सरकारले निष्पक्ष र पारदर्शी छानबिन गर्नुपर्ने माग गरेकी छन्।

भण्डारीले फेसबुकमा लेखेकी छन्, “आज हाम्रो घरका सम्पूर्ण वस्तु र संरचना डढाएर तोडेर विध्वंस गरिएको छ। ८२ वर्षकी सासू, ११ वर्षकी अवोध छोरी, ४० वर्षदेखि राजनीतिमा सक्रिय मेरा श्रीमान् र अन्य परिवारका सदस्य सुरक्षित भए पनि हामी छाना, नाना र खाना विहिन भयौँ। यो पीडा जेनजी आन्दोलनको नाममा भएको विध्वंस भन्दा बढी छ।”

उनले थपिन्, “हामीले कुनै नाजायज काम गरेका भए हामीलाई तोकेका कठोर सजाय स्वीकार्य छ। तर नभएमा, जेनजी आन्दोलनको नेतृत्वले हाम्रा सन्तानहरुलाई जवाफ दिनु पर्छ।”

भण्डारीले आफ्नो परिवारले ३० वर्षभन्दा बढी धरानमा बिताएको जीवन, कठिन परिश्रम र पुर्ख्यौली सम्पत्तिहरूको क्षति भएको उल्लेख गर्दै भनिन्, “धुँवाको मुस्लोमा हाम्रो श्रम, पसिना र स्मृतिका सामग्रीहरू सबै उडाइयो। हाम्रो परिवारलाई भ्रष्ट र अपराधीको रूपमा चित्रित गर्ने प्रयासले अझ बढी पीडा दिएको छ।”

उनी न्याय, समानता र जवाफदेही सरकारको पक्षमा सधैं लड्ने योद्धा भएको उल्लेख गर्दै लेखिन्, “अबोध बाबु–नानीहरुप्रति भावपूर्ण श्रद्धाञ्जली अर्पण गर्दछु र घाइतेहरूको शीघ्र स्वास्थ्यलाभको कामना गर्दछु।”

अन्त्य गर्दै भण्डारीले लेखिन्, “घर ध्वस्त पार्ने कार्यका मतियारहरूले सुनून्, अब त्यही खरानीमा उभिएर हामी नयाँ जीवनको यात्रा सुरु गर्नेछौँ।”

भण्डारीको स्टाटस जस्ताको तस्तै :-
आज हाम्रो घरका सम्पूर्ण वस्तु र संरचना डढाएर तोडेर विध्वंस वनाएर वर्खे झरी र चाड्बाडको मुखमा छाना नाना र खाना विहिन वनाईएकोछ । मेरी ८२ वर्षकी वृद्ध सासू आमा ११ वर्षकी अवोध छोरी ४० वर्ष देखि निष्ठाको राजनितिमा अटल मेरा श्रीमान्, १० वर्षे हिंसात्मक सशस्त्र द्वन्द्वको समय आफ्नो ज्यान दाउमा लगाएर मानव अधिकारको रक्षाका लागी समर्पित मेरो देवर ,देवरानी र पृय छोरा (भतिज) समेतले ज्यान सुरक्षित गरेका छौँ ।
अब वन्ने सरकारले यो र यस्ता घटनाहरुको निष्पक्ष र पारदर्शी छानविन गर । तिम्रा छानविनले हामीले कुनै नाजायज गरेको पायौ भने तिमिले तोकेका कठोर भन्दा कठोर सजाय हामीलाई स्वीकार्य छ । तर यो भएन भने हामी त रहौँला नरहौँला, तर Gen Z पुस्ताको यो आन्दोलनको नेतृत्वले हाम्रा सन्तानहरुलाई निरन्तर जवाफ दिनु पर्छ।
हामी छ जना छाना, नाना र खाना विहिन हुँदा जति पीडा भएको छ जेन जी का नाममा भएको आन्दोलनका नाममा मुलुकका ऐतिहसिक सम्पदा र देश जलाएको घटनाले त्यो भन्दा वढी पीडा भएकोछ।
मेरा श्रीमानले र हामीले ३० वर्ष भन्दा वढी धरानमा डेराको जीवन वितायौँ, म बेहुली भएर डेरामा नै भित्रिएँ, त्यति नै अवधि मेरा देवर देवरानीले धनकुटामा डेराको जीवन विताएर भतिज समेत डेरामा नै जन्मियो, हुर्कियो।
पारिवारिक सल्लाहमा वुढा ससुराका पाला देखिको पैतृक सम्पत्ति , हामी सबैले गाँस गर्जो गर्दै बचाउन सकेको केही रकम , नेपाल वैंक, सहकारी संस्था र केही साथीभाइ सँगको सापटि समेतले एउटा घर वनाए पछि , धनकुटामा वन्दोबस्तिका लागि देवर देउरानीले जोडेका सरसामान समेत पछिल्लो समय एउटै छाना मुनि जोगाएका थियौँ । हामीसँग भएका पुस्तकहरू र निम्न मध्यम स्तरको जीवन शैलीको जीवन निर्वाहका सरसामानहरू सबै डढाई दियौ, लुटिदियौ । धुँवाको मुस्लो सँगसँगै हाम्रा श्रम, पसिना र पुर्ख्यौली स्मृतिका सामग्रीहरु सबै उडाएका छौ ।
त्यो आगोको मुस्लो उड्दा भन्दा वढी विशेष मलाई र मेरो परिवारलाई भ्रष्ट र अपराधि करार गरेर वर्षौँदेखि चिथोरेर कोपरेको पीडा ठुलो छ। जसजसले सुनियोजित रूपमा म र मेरो परिवारलाई भ्रष्ट र अपराधिका रूपमा नियोजित रूपमा जनजनमा चित्रित गरेका थिए, हिजोको मेरो घर ध्वस्त हुनमा तोडफोड गर्न आउने जत्तिकै ती पनि अपराधी हुन् भन्न मलाई कुनै डर र संकोच छैन।
अहिले मेरो घर परिवारको अवस्था शून्य भए पनि यस्ता प्रकृतिका अभावलाई हाँसि हासि गुजारेका अनेकन भोगाई हामीसँग छन् । म न्याय, समानता, जवाफदेही जन उत्तरदायी सरकार, सदाचारको पक्षमा सधैँ लड्दै आएको एक योद्दा हुँ, त्यसैले म अहिलेको जेन जि पुस्ताले उठाएको मुद्दाहरुको संवोधन हुनुपर्छ भन्ने पक्षमा छु । यो आन्दोलनमा अबोध कलिला बाबु नानीहरुलाइ राज्यले गरेको दमन र बर्बरता पूर्वक गरेको हत्या जति निन्दा गरेपनि कमै हुन्छ ।यो आन्दोलनमा जीवन उत्सर्ग गर्ने अबोध बाबु नानिहरु प्रति भावपूर्ण श्रध्दाञ्जली अर्पण गर्दछु । परिवार जनमा समवेदना ब्यक्त गर्दछु। घाइतेहरुको शिघ्र स्वास्थ्यलाभको कामना गर्दछु ।
अन्तमा, मैले धरानको उपमेयर र कार्यवाहक मेयर हुँदा नगर र नगर वासीका लागि गरेका काम ईतिहासमा गर्व गर्न लायक छन् भन्नेमा म विश्वस्त छु ।
घर ध्वस्त पार्ने कामका मतियारहरू सुन ! अब त्यही खरानीमा उभिएर आस्था र विश्वासको पर्खाल अझै वलियो वनाउँदै, सतिसाल जस्तो ठींग उभिने जीवनको नयाँ यात्राको संकल्प गर्दछु ।