काठमाडौं— नेपाली कांग्रेसको विशेष महाधिवेशन पक्षधरले पेश गरेको ८ बुँदे प्रस्तावमा पार्टीको संस्थापन पक्षले औपचारिक जवाफ फर्काएको छ।
पार्टीका कार्यवाहक सभापति पूर्णबहादुर खड्काका अनुसार ८ बुँदामध्ये ३ बुँदा स्वीकार गर्न नसकिने स्पष्ट गरिएको छ। संस्थापन पक्ष महामन्त्री गगन थापालाई भावी प्रधानमन्त्रीको उम्मेदवार तोक्ने प्रस्तावमा तयार नभएको खड्काले जनाएका छन्।
यसैगरी, सभापति शेरबहादुर देउवा निष्क्रिय हुने प्रस्तावलाई पनि संस्थापन पक्षले खारेज गरेको छ। खड्काले उक्त प्रस्तावलाई सभापतिको अपमानजनक बहिर्गमनको रूपमा व्याख्या गर्दै स्वीकार गर्न नसकिने बताएका छन्।
साथै, सहमति कार्यान्वयनका लागि उच्चस्तरीय समिति गठन गर्ने प्रस्तावप्रति पनि संस्थापन पक्षले असहमति जनाएको छ। प्रस्तावित समितिले पार्टी संरचना र नेतृत्वको वैधानिकतामा असर पार्ने निष्कर्षमा संस्थापन पक्ष पुगेको बताइएको छ।
कांग्रेसभित्रको जारी विवाद समाधानका लागि संवाद जारी रहे पनि मुख्य प्रस्तावहरूमा सहमति जुट्न नसक्दा राजनीतिक गतिरोध कायमै रहेको छ।
