काठमाडौँ — नेकपा (एकीकृत समाजवादी)का सम्मानित नेता झलनाथ खनालले नेकपा (एमाले) विभाजन गर्नु नै एक ऐतिहासिक गल्ती भएको स्पष्ट रूपमा स्वीकार गरेका छन्।
पत्रकार जगदीश खरेलसँगको कुराकानीमा खनालले आफूहरूले एमालेमा विद्रोह गरेर नयाँ दल गठन गर्दा त्यसको औचित्य प्रमाणित गर्न नसकेको बताएका छन्। “एमालेप्रति गहिरो माया छ, त्यो पार्टी बनाउँदा लडाइँ गरियो, जेल नेल खाइयो,” उनले भने, “त्यो पार्टी छोड्नु गल्ती थियो।”
खनालले पार्टीको विघटनभन्दा संस्थागत महत्त्व र विचारगत निरन्तरताको आवश्यकता झल्काउँदै व्यक्तिगत विरोधको आधारमा निर्णय गर्नु अनुचित भएको बताएका छन्। उनले एमाले अध्यक्ष केपी शर्मा ओलीको आलोचना गर्दै पनि एमालेलाई सशक्त संस्थाको रूपमा हेर्ने आफ्नो दृष्टिकोण दोहोर्याए।
“म ओलीको पक्षमा होइन, तर एमाले एउटा आन्दोलनको प्रतिनिधि संस्था थियो। त्यो संस्था छाड्नु चाहिँ गलत भयो,” खनालले भने।
झलनाथ खनालले वर्तमान पार्टी नेतृत्वप्रति पनि असन्तुष्टि प्रकट गर्दै अध्यक्ष माधवकुमार नेपालले पार्टीलाई व्यक्तिगत ढंगले चलाइरहेको आरोप लगाए।
“महत्त्वपूर्ण निर्णयहरूमा मलाई संलग्न गरिँदैन। पार्टी एक व्यक्तिको बपौती होइन,” उनले भने।
खनालले नेपालसँग सुरूमा सैद्धान्तिक सहमति रहे पनि पछिल्लो समय विशेषतः जनताको बहुदलीय जनवाद र वैज्ञानिक समाजवादको विषयमा मतभेद चुलिएको बताए।
समाजवादी मोर्चाको पछिल्लो बैठकमा वामदेव गौतमलाई बोलाएर आफूलाई नबोलाइएको गुनासो गर्दै उनले पार्टीभित्र आन्तरिक लोकतन्त्र नहुँदो संकेत पनि गरे।
नेकपा माओवादी केन्द्रसँग पार्टी एकता हुन सक्ने अड्कलप्रति उनले आपत्ति जनाए। “मिडियाबाट मात्रै थाहा पाउँछु, पार्टीभित्र छलफल भएको छैन,” खनालले स्पष्ट पारे। उनले कुनै पनि दलसँग एकता गर्नुअघि सैद्धान्तिक स्पष्टता र संस्थागत छलफल अपरिहार्य हुने उल्लेख गरे।
उनको भनाइ अनुसार अहिले एकीकृत समाजवादी पार्टी कुनै पनि राजनीतिक दलसँग एकता गर्ने अवस्थामा छैन।
