काठमाडौं— 'ग्रेटर नेपाल' अभियानका अगुवा तथा अभियन्ता फणिन्द्र नेपाल पक्राउ परेका छन्। काठमाडौं उपत्यका अपराध अनुसन्धान कार्यालयको प्रहरी टोलीले उनलाई सोमबार दिउँसो बूढानीलकण्ठ-१० बाट नियन्त्रणमा लिएको हो।
प्रहरीका अनुसार, युवराज खत्रीले दिएको 'चेक अनादर' (चेक बाउन्स) को जाहेरीका आधारमा नेपाललाई पक्राउ गरिएको हो। २०७६ सालमा भएको आर्थिक लेनदेनलाई लिएर खत्रीले नेपालविरुद्ध प्रहरीमा जाहेरी दिएका थिए। जाहेरीमा उल्लेख भएअनुसार, खत्रीले नेपाललाई केही रकम ऋण दिएको र उक्त ऋण तिर्न नेपालले दिएको चेक बैंकमा नसाटिएपछि विवाद सुरु भएको थियो।
यस विषयमा काठमाडौं उपत्यका अपराध अनुसन्धान कार्यालयले भने अदालतको फैसला कार्यान्वयनका लागि उनलाई पक्राउ गरिएको जनाएको छ। प्रहरीका अनुसार, २०७९ जेठ २५ गते काठमाडौं जिल्ला अदालतले यसै मुद्दामा फैसला सुनाएको थियो। सोही फैसला कार्यान्वयनको सिलसिलामा नेपाललाई नियन्त्रणमा लिइएको हो।
नेपालको दाबी: "मलाई मिटरब्याजमा फसाइयो" यता, पक्राउ परेका अभियन्ता नेपालले भने आफूमाथि झूटो मुद्दा लगाइएको दाबी गरेका छन्। आफूले पहिल्यै तिरिसकेको ऋणको विषयलाई लिएर फेरि विवाद निकालिएको उनको भनाइ छ।
जाहेरवाला खत्रीले आफूलाई 'मिटरब्याज' मा फसाएर लामो समयदेखि अनावश्यक दुःख दिइरहेको नेपालले बताएका छन्। अदालतको फैसला र नेपालको दाबी बाझिएको अवस्थामा प्रहरीले यस विषयमा थप अनुसन्धान अगाडि बढाएको छ।
