काठमाडौं—भारतको असमस्थित जोरहाट (रोवरिया) वायुसेना स्टेशनमा भारतीय वायुसेनाको एउटा 'AN-32' परिवहन विमान दुर्घटनाग्रस्त भएको छ। शनिबार विमान ल्यान्डिङ गर्ने क्रममा उक्त दुर्घटना भएको हो।
दुर्घटनापछि विमानमा आगो लागेको र दुर्घटनास्थलमा तत्कालै आपतकालीन उद्धार तथा आगो निभाउने कार्य (Firefighting operations) सुरु गरिएको छ। दुर्घटनाग्रस्त AN-32 परिवहन श्रेणीको विमान हो, जसलाई मुख्यतया सैनिक, रसद सामग्री र सैन्य उपकरणहरू ओसारपसार गर्न प्रयोग गरिन्छ।
भारतीय वायुसेनाले आधिकारिक रूपमा दुर्घटनाको पुष्टि गरेको छ। वायुसेनाले भनेको छ, "आज जोरहाटमा ल्यान्डिङ गर्ने क्रममा वायुसेनाको एउटा AN-32 विमान दुर्घटनामा परेको छ। दुर्घटनाको कारण पत्ता लगाउन 'कोर्ट अफ इन्क्वायरी' (Court of Inquiry) गठन गरिएको छ।"
विमानमा कति जना सवार थिए र मानवीय क्षति कति भयो भन्ने बारे हालसम्म कुनै आधिकारिक विवरण सार्वजनिक गरिएको छैन। विस्तृत विवरण आउन बाँकी छ।
