- भगवती अर्याल
विराटचोक,११ मंसिर । मोरङको सुन्दरहरैंचामा रहेको सुकुना बहुमुखी क्याम्पसले विद्यार्थीहरूलाई छात्रवृत्ति वितरण गरेको छ । सोमबार भएको क्याम्पस सञ्चालक परिषदको सत्राैं बैठकको अवसर पारेर १७४ जना विद्यार्थीहरूलाई छात्रवृत्ति वितरण गरेको हो ।
छात्रवृत्ति वितरण सत्रमा अक्षय कोषदाताबाट प्राप्त भएको अक्षय कोषको व्याजबाट ५ लाख १५ हजार विभिन्न बैङ्क‚सहकारी‚उद्योग‚ प्रतिष्ठान‚क्लव‚ व्यक्तिहरुबाट प्राप्त भएको छात्रवृत्ति रकम ४ लाख २५ हजार र क्याम्पस स्रोतबाट ४ लाख जम्मा गरी १३ लाख चालिस हजार बराबरको छात्रवृत्ति वितरण गरिएको क्याम्पस प्रमुख अर्जुनराज अधिकारीले बताउनु भयो ।
क्याम्पसको विभिन्न तह र कक्षाको परीक्षामा उत्कृष्ट अङ्क प्राप्त गर्ने जेहेन्दार विद्यार्थीहरूलाई छात्रवृत्ति रकम वितरण गरिएको सहायक क्याम्पस प्रमुख गणेशप्रसाद दाहालले जानकारी दिनु भयो । सोहि कार्यक्रममा दमक क्याम्पसमा आयोजित कोसी प्रदेश स्तरीय फुटसल प्रतियोगितामा सुकुना बहुमुखी क्याम्पसबाट भागलिइ उत्कृष्ट खेल प्रदर्शन गरी प्रथम स्थान हासिल गर्ने क्याम्पसका १० जना विद्यार्थीहरूलाई नगद रकम र प्रमाणपत्र वितरण गरिएको थियो ।
उक्त कार्यक्रमका प्रमुख अतिथि जिल्ला समन्वय समिति मोरङका प्रमुख अजम्बर राईले छात्रवृत्ति वितरणले परीक्षा नतिजामा अझै सुधारमा आउने र छात्रवृत्ति तथा नतिजामा क्याम्पस उत्कृष्ट रहेको बताउनु भयो ।
कार्यक्रममा क्याम्पस सञ्चालक समितिका अध्यक्ष तथा सदस्यहरू‚पूर्वक्याम्पस प्रमुखहरू रामप्रसाद काफ्ले‚पीतकुमार श्रेष्ठ‚ अक्षय कोषदाताहरू‚छात्रवृत्ति दाता संघसंस्था,शिक्षाप्रेमी महानुभावहरु शिक्षक‚कर्मचारी र विद्यार्थीको सहभागीता रहेको थियो ।
कार्यक्रमको अध्यक्ष समेत रहनुभएका सञ्चालक समितिका उपाध्यक्ष ललितबहादुर श्रेष्ठले अक्षय कोषदाता र छात्रवृत्ति दातालाई धन्यवाद ज्ञापन गर्दै छात्रवृत्ति प्राप्त गर्न सफल विद्यार्थीहरूलाई बधाई ज्ञापन गर्नु भएको थियो । छात्रवृत्ति वितरण सत्रको सञ्चालन सहायक क्याम्पस प्रमुख बलराम पोखरेलले गर्नु भएको थियो ।
