ढाका—बंगलादेशमा हिन्दू अल्पसंख्यक नेतामाथि भएको निर्मम हत्या घटनाले चौतर्फी निन्दा र आक्रोश उत्पन्न गरेको छ। उत्तरी बंगलादेशको दिनाजपुरस्थित बासुदेवपुर गाउँका बासिन्दा र बंगलादेश पूजा उद्यापन परिषद्को बिरल इकाईका उपाध्यक्ष ५८ वर्षीय भावेश चन्द्र रायको बिहीबार अपहरणपछि कुटपिट गरी हत्या भएको हो।
भावेश चन्द्र रायलाई बिहीबार दिउँसो अज्ञात व्यक्तिहरूले उनको घरबाटै अपहरण गरेका थिए। प्रत्यक्षदर्शीका अनुसार, चार जना व्यक्तिहरू दुई मोटरसाइकलमा आएर उनलाई नजिकैको नाराबारी गाउँमा लगेर निर्ममतापूर्वक कुटपिट गरेका थिए।
रायकी श्रीमती शान्तनाले जानकारी दिएअनुसार, बिहीबार दिउँसो ४:३० बजे फोनमार्फत उनलाई घरमा छन् कि छैनन् भनेर सोधिएको थियो। करिब आधा घण्टापछि आक्रमणकारीहरूले घरमै आएर उनलाई जबरजस्ती लगे।
बिहीबार साँझ नै अपहरणकारीहरूले भावेशलाई अचेत अवस्थामा भ्यानमा राखेर उनको घर फिर्ता पठाइदिएका थिए। उनलाई तत्काल अस्पताल लगिएको भए पनि चिकित्सकहरूले उनलाई मृत घोषित गरे।
यो घटनाले बंगलादेशमा अल्पसंख्यक हिन्दुहरूमाथि हुने अत्याचारको गम्भीर रूप उजागर गरेको छ। मानव अधिकारवादी समूहहरूले बंगलादेश सरकारलाई अल्पसंख्यकहरूको सुरक्षामा असफल भएको भन्दै कडा आलोचना गरेका छन्।
बंगलादेशको अन्तरिम सरकार, विशेष गरी मुहम्मद युनुसको नेतृत्वमाथि, अल्पसंख्यकहरूको सुरक्षाका लागि प्रभावकारी कदम चाल्न नसकेको आरोप लगाइएको छ। यो घटना बंगलादेशको सामाजिक सद्भाव र धार्मिक सहिष्णुतामाथि गम्भीर चुनौतीका रूपमा देखिएको छ।
